Првите 30.000 вакцини против сезонски грип пристигнаа во земјава, а вакцинацијата се очекува да започне во предвидениот период од 16 до 25 октомври.
За почетокот на имунизацијата и дистрибуцијата на вакцините се чека официјално известување од Министерството за здравство.
Од Центарот за јавно здравје – Прилеп информираат дека интересот за вакцинација против сезонски грип е сè поголем, но сe уште е потребна поголема информираност на населението за значењето на имунизацијата.
Според епидемиологот д-р Татјана Станимировиќ, особено мал е интересот за вакцинација кај бремените жени, поради што е неопходна дополнителна промоција на придобивките од вакцината.
„Ако до пред неколку години најчесто се пријавуваа повозрасни лица со хронични заболувања, сега состојбата се менува“, посочуваат од ЦЈЗ – Прилеп. Интерес за имунизација покажуваат и помлади лица, како и оние кои се целосно здрави.
Од Центарот информираат дека во Прилеп засега нема регистрирани случаи на грип.
Пријавувањето за бесплатна вакцинација годинава ќе се врши електронски, преку системот „Мој термин“. Распределбата на вакцините ќе се организира преку центрите за јавно здравје и нивните подрачни единици.
Од Министерството за здравство најавуваат и дополнителна испорака од 26.000 вакцини, која се очекува до 15 ноември.
Здравствените работници апелираат до граѓаните, особено до лицата од ризичните групи, навремено да се информираат за можностите за вакцинација против сезонски грип.
